न्यूनतम साझा कार्यक्रम र सङ्कल्प प्रस्ताव ल्याउनु ठूलो कुरा होइन,...
चैत १५, २०८० बिहिबार
कैलाली – सुदूर पश्चिम प्रदेश सरकारले ल्याएको बजेटको विरोधमा प्रमुख प्रतिपक्षी दल नेपाली कांग्रेस र राष्ट्रिय जनता पार्टीका प्रदेश सासंदहरुले रातो किताब जलाएका छन् ।
आगामी आर्थिक वर्ष २०७६/०७७ को बजेटको विरोध गर्दै सांसदहरुले प्रदेश सभाको गेटमै रातो किताब जलाएका हुन् । सासंदलाई समेत अपमान गर्ने गरी प्रदेश सरकारले बजेट ल्याएको आरोप लगाउँदै रातो किताब जलाइएको हो । सरकारविरुद्ध नाराबाजी गर्दै प्रमुख प्रतिपक्षी दलका सांसदहरुले रातो किताब जलाएका हुन् ।
प्रमुख प्रतिपक्षी दल कांग्रेसका नेता डाक्टर रणबहादुर रावलले बजेट भाषण गरेको चार दिनपछि मात्रै रातो किताब दिइएको र रातो किताबमा योजनाहरु प्रष्ट रुपमा नराखिएकोले रातो किताब जलाएको बताउनुभयो । प्रमुख प्रतिपक्षीदल नेपाली कांग्रेसले अर्को प्रतिपक्षी दल राजपाको समर्थन र साथ लिएर बिहीबार प्रदेश सभा बैठकमा अवरोध गर्दै रातो किताब जलाएको हो ।
रातो किताब जलाउनु अघि प्रदेश सभा बैठक अबरुद्ध गर्दै नेपाली कांग्रेसका सासंद भरत बहादुर खड्काले प्रदेश सरकारले रातो किताबको सट्टा खाली किताब ल्याएको बताउनुभयो । उहाँले सरकारले रातो किताबमा उल्लेख गरेका योजनाहरुले विकास र समृद्धि नभई लुट र भ्रष्टाचार बढाउने प्रस्ट पार्नुभयो ।
यस्तै बिहीबार दिउँसो तीन बजे बोलाइएको प्रदेश सभा बैठकमा समेत कांग्रेसले अवरोध सिर्जना गरेको थियो । कांग्रेसले अवरोध गरेपछि ८ गतेसम्मका लागि बैठक स्थगित गरिएको छ । दिउँसो ३ बजे सभामुख अर्जुनबहादुर थापाले संसद बैठक सुरु भएको जानकारी गराएलगत्तै टेबुल ठटाउँदै प्रतिपक्षीदलका सांसदहरुले आ आफ्नो सिटबाट उठेर मौन विरोध जनाएका थिए ।
बैठक स्थगित गर्नु अघि सभामुख थापाले आर्थिक मामिला तथा योजना मन्त्री झपटबहादुर बोहरालाई बजेटबारे प्रस्ट पार्न आग्रह गरे पनि प्रतिपक्षी सासंदहरुले अवरोध जारी राखेपछि असार ८ गतेसम्मका लागि बैठक स्थगित भएको हो ।
सीताराम ओझा कैलालीका उज्यालाे सहकर्मी हुनुहुन्छ ।