आज कोशी, बाग्मती, गण्डकी र कर्णालीका एक/दुई ठाउँमा हल्का पानी...
बैशाख ७, २०८१ शुक्रबार
ग्रिसविरुद्ध २-० गोलअन्तरको जित निकाल्दै इटलीले सन् २०२० मा हुने युरोकप फुटबलमा स्थान सुरक्षित गरेको छ ।
छनोट प्रतियोगिताको समूह जे मा रहेको इटलीले सुरुवाती ७ खेलमा शतप्रतिशत जित निकालेको छ । ६ टोली सम्मिलित समूहमा १० खेल खेल्नुपर्छ । इटलीले ३ खेल अगावै लक्ष्य भेट्टाएको हो ।
७ खेलबाट उसको २१ अंक छ भने दोस्रो स्थानको फिनल्यान्डको १२, अर्मेनिया र बोस्नियाको १० अंक छ । ग्रिसको ५ र लिचटेन्सटाइनको २ अंकमात्र छ । यी दुवै टिम छनोटबाटै बाहिरिने निश्चित भइसकेको छ ।
रोमास्थित ओलम्पिक रंगशालामा भएको खेलमा घरेलु टोली इटलीले पहिलो हाफमा अग्रता बनाउन चुकेको थियो । ग्रिसको शशक्त रक्षापंक्ति तोड्न उसलाई दोस्रो हाफ कुर्नुपर्यो ।
६३औं मिनेटमा जोर्जिन्होले पेनाल्टीमार्फत इटलीलाई अग्रता दिलाएका थिए । ग्रिसका आन्द्रेस बोउचाकाकिसले बक्सभित्र ह्यान्ड गरेपछि इटलीले पेनाल्टीको अवसर पाएको थियो ।
सब्स्टिच्युड स्ट्राइकर फेडेरिको बेर्नादेचीले ७८ औं मिनेटमा दोस्रो तथा निर्णायक गोल गर्दा लियोनार्दो बोनुक्कीले पास उपलब्ध गराएका थिए ।