काठमाण्डौ - नियमित उपचार तथा स्वास्थ्य परीक्षणका लागि ग्राण्डी अस्पतालमा भर्ना हुनु भएका प्रधानमन्त्री केपी शर्मा ओलीलाई बुधबार राति वा बिहीबारसम्ममा डिस्चार्ज गरिने अस्पतालले जनाएको छ ।  

प्रधानमन्त्री ओलीकी निजी चिकित्सक तथा ग्रान्डी अस्पतालको नेफ्रोलोजी तथा ट्रान्सप्लान्ट मेडिसिन विभागकी अध्यक्ष प्रा.डा. दिव्यासिंह शाह र अस्पतालका मेडिकल डाइरेक्टर डाक्टर चक्रराज पाण्डेद्वारा जारी प्रेस विज्ञप्तिमा प्रधानमन्त्री ओलीको स्वास्थ्य अवस्था सामान्य भएको बताइएको छ ।

प्रधानमन्त्री ओली बुधबार बिहान नियमित स्वास्थ्य परीक्षणका लागि काठमाण्डौको धापासीमा रहेको ग्राण्डी इन्टरनेशनल अस्पताल पुग्नुभएको थियो ।

१२ वर्षअघि मिर्गौला प्रत्यारोपण गर्नुभएका प्रधानमन्त्री ओलीले नियमित रुपमा स्वास्थ्य परीक्षण गराउँदै आउनुभएको छ ।

स्वास्थ्यमा समस्या देखिएपछि गएको भदौ महिनामा उहाँले सिंगापुरको नेशनल युनिर्भसिटी अस्पतालमा उपचार गरेर आएपछि प्रधानमन्त्री ओलीले नियमित स्वास्थ्य परीक्षण गर्दै आउनुभएको छ ।