सबै सहकारी संस्था सामाजिक सुरक्षा कोषमा जान तयार

 कात्तिक २५, २०७६ सोमबार १३:१०:४ | उज्यालो सहकर्मी

काठमाण्डौ – सहकारी संस्थाका प्रतिनिधिहरुले सरकारको साथ र सहयोग भए आफूहरु सामाजिक सुरक्षा कोषमा जाने प्रतिबद्धता जनाएका छन् । सोमबार श्रम, रोजगार तथा सामाजिक सुरक्षा मन्त्री गोकर्ण विष्टसँगको छलफलमा सहकारी संस्थाका प्रतिनिधिहरुले यस्तो प्रतिबद्धता जनाएका हुन् ।

छलफलमा मन्त्री विष्टले सामाजिक सुरक्षा कोषमा सहभागी हुनका लागि सहकारी क्षेत्रले देखाएको तत्परताका लागि धन्यवाद दिंदै सबै सहकारी र त्यसमा कार्यरत श्रमिकलाई कोषमा सहभागी गराउन निर्देशन दिनुभयो । 

उहाँले सहकारी सहित सबैलाई अतिरिक्त करको भार नपर्ने गरी सरकारले पहल गरिरहेको पनि जानकारी गराउनुभयो ।

सहकारी संस्थाका प्रतिनिधिले देशभरी २० हजारभन्दा बढी सहकारी सक्रिय रहेको र त्यहाँ करिब ५ लाख कर्मचारी प्रत्यक्ष रोजगारीमा भएको भन्दै चाँडै कोषमा सूचीकृत हुने प्रतिबद्धता जनाए ।

छलफलमा सामाजिक सुरक्षा कोषको बारेमा सहकारी संघ मातहतका प्रशिक्षकलाई प्रशिक्षित गर्ने र उनीहरुलाई सबै जिल्लामा जागरणका लागि पठाउने सहमति भएको छ ।

यसैगरी काठमाण्डौ उपत्यकाका सहकारीको लागि आउँदो शुक्रबार प्रशिक्षण कार्यक्रम गर्ने निर्णय पनि भएको छ । 

छलफलमा नेपाल वचत तथा ऋण केन्द्रिय सहकारी संघका अध्यक्ष डीबी कार्की, राष्ट्रिय सहकारी बैंकका अध्यक्ष केबी उप्रेती, साना किसान सहकारी संघका सञ्चालक सहित पदाधिकारी तथा कोषका प्रमुख कार्यकारी अधिकृत कपिलमणि ज्ञवालीकाे उपस्थिति थियो । 

अन्तिम अपडेट: चैत १२, २०८०

तपाईको प्रतिक्रिया