काठमाडौं – नेपाल चिकित्सक संघले बिहीबार देशभरका स्वास्थ्य संस्थामा आकस्मिक बाहेकका सेवा बन्द गर्ने घोषणा गरेको छ ।

आमरण अनसनरत डाक्टर गोविन्द केसीको जीवन रक्षाका लागि सरकारले कुनै पहल नगरेको भन्दै संघले देशभरका स्वास्थ्यउ संस्था ठप्प पार्ने घोषणा गरेको हो । संघले सरकारी वार्ता टोलीले डाक्टर केसीसँग वार्ता गर्न भन्दा पनि डाक्टर केसीलाई काठमाडौं ल्याउने प्रयास भएको आशंका व्यक्त गरेको छ ।

चिकित्सक संघले बिहीबार देशभरका स्वास्थ्य संस्थामा आकस्मिक बाहेकका सबै सेवा बन्द गर्ने र दिउँसो १ बजे माइतेघर मण्डलामा भेला हुने निर्णय गरेको छ ।सरकार अझै संवेदनशील नभए देशभर आकस्मिक बाहेकका स्वास्थ्य सेवा अनिश्चितकालका लागि बन्द गर्न बाध्य हुने संघले चेतावी दिएको छ ।

१५ औं अनशनको रुपमा डाक्टर केसी १९ दिनदेखि जुम्लामा अनसनरत हुनुहुन्छ । सरकारले डाक्टर केसीसँग वार्ता गर्नका लागि वार्ता टोली बनाएर वार्ता थाले पनि वार्ता निष्कर्षमा पुगेको छैन् ।