बारा – नेपाली कांग्रेसका पूर्व महामन्त्री एवम् गृहमन्त्री कृष्णप्रसाद सिटौलाले ओली सरकार संघीयता विरोधी रहेको आरोप लगाउनुभएको छ ।

नेपाली कांग्रेस बाराले शनिबार विपी स्मृति भवन कलैयामा आयोजना गरेको पत्रकारसँगको भेटघाट कार्यक्रममा सिटौलाले ओली नेतृत्वको सरकारले दुई तिहाईको दम्भमा संघीय लोकतान्त्रिक गणतान्त्रिक व्यवस्थालाई लत्याएर संघीयता विरोधी काम गरेको आरोप लगाउनुभयो ।

सभामुख तथा उपसभामुख एउटै पार्टीको राख्न नपाइने संविधानमा प्रष्ट व्यवस्था भए पनि पार्टीको पूर्ण बहुमतको दम्भमा दुवै आफ्नै पार्टीका व्यक्ति राखेर संविधान विपरित कार्य गरेको उहाँले आरोप छ ।

देशको विकास तथा नागरिकको हितको काम छोडेर, बलात्कार, हत्या, हिंसा, बेरोजगारी, महंगी, कर वृद्धि लगायतकालाई केपी ओली सरकारले बढावा दिएको महामन्त्री सिटौलाले आरोप छ ।

स्वतन्त्र अदालतमाथि प्रहार, प्रहरी प्रशासनमाथि हस्तक्षेपलगायतका संघीयता विरोधी काम ओली सरकारले गरेको सिटौलाको आरोप छ । अपराधलाई नियन्त्रण गर्नुको साटो ओली नेतृत्वको सरकारले झन् बढावा दिएको सिटौलाले बताउनुभयो ।

प्रेस र पत्रकारमाथि अंकुश लगाई उनीहरुलाई तर्साएर आफू अनुकुल बनाउने खेलमा बामपन्थी सरकार लागेको पनि सिटौलाको आरोप छ ।

कञ्चनपुरको निर्मला पन्तको बलत्कारपछि हत्या गरेकोलाई ढाकछोप गर्न त्यसमा भएको सत्य प्रमाणसमेत ओली सरकारले मेटाएको कांग्रेसका महामन्त्री सिटौलाले आरोप लगाउनुभयो ।