धनुषा – धनुषामा विषाक्त घरेलु जाँड रक्सी सेवनबाट चारजनाको ज्यान गएको छ । ज्यान जानेमा धनुषाको कमला नगरपालिका ५ लक्कड बस्ने ४० वर्षका रामनाथ पाशवान, ५० वर्षका रामचन्द्र पाशवान , ३० वर्षका मणि पाशवान र वडा नम्बर ६ मडान बस्ने ४५ वर्षका साविर अंशारी रहेको प्रहरीले जनाएको छ ।

मदिरा सेवनबाट सिकिस्त विरामी परेका जामुन पावशवानको जनकपुर अञ्चल अस्पतालमा उपचार भइरहेको धनुषाका नायव प्रहरी उपरीक्षक दिपेन्द्र शाहीले जानकारी दिनुभयो ।

स्थानीयका अनुसार एक युवकले वैदेशिक रोजगारमा जानु अघि मंगलबार राति खसी काटेर भोज दिएका थिए । त्यही भोजमा जाँड रक्सी खाएका उनीहरुको अवस्था रातिदेखि नै सिकिस्त बनेको थियो । 

बुधबार बिहान ९ बजेदेखि बेलुकासम्म चार जनाको ज्यान गएको छ । घटना विषयमा थप अनुसन्धान भैरहेको जिल्ला प्रहरी कार्यालय धनुषाले जनाएको छ ।