सर्लाही - सर्लाहीको वागमतीमा जारी तेस्रो राजर्षि जनक कप फुटबल प्रतियोगिता अन्तर्गत बुधबार भएको खेलमा थ्रीस्टार क्लब काठमाण्डौ आयोजक बागमती युवा क्लब निलोलाई हराउँदै सेमिफाइनल प्रवेश गरेको छ ।

सोमबारदेखि बागमती नगरपालिकाको कर्मैयामा रहेकाे सन्तोष श्रेष्ठ स्मृति खेल मैदानमा जारी प्रतियोगिताकाे बुधबारकाे खेलमा थ्रीस्टार क्लब  ४–० ले विजयी हुँदै प्रतियोगिताको अन्तिम चारमा प्रवेश गरेको छ ।

यसअघिको उद्घाटन खेलमा सरस्वती युवा क्लब काठमाण्डाैलाई ३–१ अन्तरले हराउँदै क्वाटरफाइनलमा प्रवेश गरेको बागमती निलोले बुधबार थ्रीस्टारसँग पराजित हुँदै प्रतियोगिताबाटै बाहिरिएको छ ।

थ्रीस्टारका लागि खेल सुरु भएको २२ औं मिनेटमा सुशील राईले पहिलो गोल गरेका थिए । खेलको ६८ औं मिनेटमा अनिल गुरुङ्गले गोल गर्दै खेललाई २–० मा पुर्‍याए । थप भएको इन्जुरी समयमा थ्रीस्टारका सुशील राईले पुनः गोल थप्दै गोल ३-० काे स्थितिमा पुर्‍याए । त्यसको २ मिनेटमा थ्रीस्टारका म्यान्साले अर्को गोल थप्दै खेलमा ४–० को फराकिलो जित निकाल्न सफल भए ।

बुधबारको खेलमा उत्कृष्ट खेल खेलेका थ्रीस्टारका सुशील राईले १० हजार प्राप्त गरेका छन् । प्रतियोगिताअन्तर्गत बिहीबारको खेलमा डिफेन्डिङ च्याम्पियन सुदूर पश्चिम ११ र एपीएफ क्लबबीच खेल हुनेछ ।