पाँचथर – सञ्चालनको लागि भन्दै दुई पटक उद्घाटन गरिएको फिदिम बसपार्क अझै पनि सञ्चालनमा आउन सकेको छैन । 

फिदिम-२, पल्लोटारमा निर्माण गरिएको बसपार्कमा यातायात व्यावसायीले सवारी पार्किङ गर्न नलैजाँदा बसपार्क नाम मात्रैको भएको छ । यहाँ कुनै सवारी साधन पार्किङ हुँदैनन् ।

यो बसपार्क सञ्चालनको लागि यसअघि दुई पटक उद्घाटन गरिसकिएको छ । विसं २०७१ सालमा तत्कालीन प्रमुख जिल्ला अधिकारी कोषहरि निरौलाले उद्घाटन गर्नुभएको बसपार्क गएको वर्ष मंसिरमा फेरि तत्कालीन प्रमुख जिल्ला अधिकारी प्रकाशचन्द्र अधिकारीबाट सञ्चालन गर्ने भन्दै उद्घाटन गरिएको थियो ।

फिदिम-२ पल्लोटारमा बसपार्क निर्माण भएपछि बजारमा हुने सवारी चापको समस्याबाट मुक्ति पाउने बजारवासीको चाहना पूरा हुन सकेको छैन । बसपार्कमै सवारी साधन पार्किङ गर्न फिदिम नगरपालिकाले नगर प्रहरी र  ट्राफिक प्रहरीको टोली खटाए पनि जिल्लाका यातायात व्यावसायीहरुले बसपार्क बजार क्षेत्रभन्दा टाढा भएको र बसपार्क क्षेत्र साँघुरो भएको भन्दै सवारी साधन पार्किङ गर्न मानेका छैनन् ।

बसपार्कमा सवारी साधन पार्किङ गर्ने विषयमा यातायात व्यवसायीसँग पटक-पटक छलफल गरेर सहमति भए पनि व्यावसायीहरुले कार्यान्वयन नगरेको बसपार्क भौतिक पूर्वधार निर्माण समितिका संयोजक तथा फिदिम-२ का वडाध्यक्ष सुकपाल तुम्बापोले बताउनुभयो । 

निर्माण भएको बसपार्क सञ्चालन गर्नुको विकल्प नभएकाले बसपार्कलाई सञ्चालनमा ल्याउन अब रणनीतिक तरिकाले लाग्ने वडाअध्यक्षको भनाइ छ ।

बसपार्क निर्माणको लागि विसं २०५५ सालमा स्थानीय १० जनाले १० रोपनी जग्गा निःशुल्क दिएपछि बसपार्क निर्माण गरिएको थियो । 

फिदिम-१ शनिबारेमा रहेको अस्थायी बसपार्क साँघुरो भएको भन्दै पल्लोटारमा बसपार्क निर्माण गरिएको हो ।