काठमाण्डौ - कोभिड–१९ को प्रकोपबाट जोगिन गरिएको स्वास्थ्य सामान खरिद प्रकरणमा भ्रष्टाचार भएकाे भन्ने विषयमा छानबिन गर्न ट्रान्सपरेन्सी इन्टरनेशनल नेपालले माग गरेको छ ।

आपत्कालीन संवेदनशीलताको दुरुपयोग गर्दै राजनीतिक नेतृत्व तहकै संलग्नतामा स्वास्थ्य सामग्रीको खरिद क्रममा कमिसनखोरसँग साँठगाँठ गरी राज्यकोषको अपचलन गर्ने प्रयास भएको भन्दै प्रकरणको छानबिन गर्न माग गरिएकाे हो । 

संस्थाका अध्यक्ष खेमराज रेग्मीले पटक-पटक बिचौलियाको मिलोमतोमा राज्यकोषको ठूलो रकम अपचलन गरिरहेको भन्दै यसको छानबिन गरी दोषीलाई कारबाही गर्न माग गर्नुभएको छ । 

विज्ञप्तिमा राष्ट्रिय सङ्कटको बेलामा स्वास्थ्य सामग्री खरिद भ्रष्टाचार प्रकरणमा संलग्न राजनीतिक नेतृत्व तह समेतका सबै पदाधिकारीहरूमाथि आवश्यक अनुसन्धान गरी कारबाही गर्न माग गरिएको छ । 

अनियमितताका बारेमा सञ्चारमाध्यम एवं नागरिक तहबाट बराबर सचेत गराइरहँदा पनि सरकारले उनीहरूको आवाजको उपेक्षा गर्दै उनीहरूलाई सरकार विरोधीको रुपमा चित्रित गर्ने गरिएको विज्ञप्तिमा उल्लेख छ । 

नागरिक आवाजको उपेक्षा गर्ने देश निरङ्कुशतातर्फ उन्मुख हुने तथा निरङ्कुशताले सुशासनको धज्जी उडाउनुका साथै लोकतन्त्रको भविष्य पनि धरापमा पार्ने ट्रान्सपरेन्सी इन्टरनेशनलले उल्लेख गरेकाे छ ।