लमजुङ - लमजुङका केही पालिकाहरुले अन्यत्रबाट आफ्नो क्षेत्रमा आई ज्याला/मजदूरी गर्दै आएकाहरुलाई घर पठाउन थालेका छन् । 

लमजुङको राइनास नगरपालिकाले लकडाउनका कारण अलपत्र परेका  ४२ जना मजदूरलाई घर पठाएको छ । विभिन्न जिल्लाबाट यस ठाउँमा आएर ज्याला मजदूरी गरेका र लकडाउनका कारण अलपत्र परेका ४२ मजदूरलाई नगरपालिकाको सहयोगमा बुधबार घर पठाइएको नगरपालिकाका प्रमुख प्रशासकीय अधिकृत रामचन्द्र अधिकारीले जानकारी दिनुभयो ।

उहाँका अनुसार दाङका ७, सल्यानका १३ र रुकुमका २२ गरी ४२ जना मजदूरलाई घर पठाइएको हो । यसैगरी सुन्दर बजार नगरपालिकाले पनि आफ्नो दुई वटा नगर बसमा मंगलबार साँझ मजदूरहरुलाई घर पठाएको छ ।

देशका विभिन्न जिल्लाबाट यस क्षेत्रमा आएर मजदूरी गर्दै आएका र लकडाउन कारण अलपत्र परेका र घर जान चाहेका ९६ मजदूरलाई घर पठाइएको नगरपालिकाका प्रमुख प्रशासकीय अधिकृत चूडामणि शर्मा गौतमले जानकारि दिनुभयो । 

उहाँका अनुसार दाङ, सल्यान, सुर्खेत, चितवन, रुकुमका मजदूरलाई घर पठाइएको हो । यसअघि नगरपालिकाले आफ्नो नगर बसमा ६४ जना मजदूरलाई सल्यान पठाएको थियो ।