रुकुम पश्चिम – गएको जेठ १० गते चौरजहारी नगरपालिका ८ काे सोतीमा ६ जनाको ज्यान जाने गरी भएको घटनामा फरार रहेका पाँच जना अभियुक्तलाई पुर्पक्षकाे लागि थुनुवामा राख्ने आदेश भएको छ । 

जिल्ला अदालत रुकुम पश्चिममा मङ्गलबार भएको अभियुक्तको बयान र वादी/प्रतिवादीका वकिलहरुको थुनछेक बहसपछि भएको आदेशमा चार जना अभियुक्तलाई थुनुवामा राख्ने आदेश भएको जिल्ला अदालत रुकुम पश्चिमका निमित्त श्रेष्तेदार लक्ष्मण विकले जानकारी दिनुभयो । 

'मङ्गलबार जिल्ला अदालतमा हाजिर भएका चार जना अभियुक्तलाई बयान र थुनछेक बहसपछि पुर्पक्षकाे लागि कारागार चलान गरिएको हो', उहाँले भन्नुभयाे । पुर्पक्षकाे लागि थुनामा जानेहरुमा चौरजहारी नगरपालिका ८ का तुलाराम घर्ती, लोकेन्द्र घर्ती, सौरभ पुन र डिल्ली घर्ती रहेका छन् ।

पाँच जना फरारको सूचीमा रहेकामध्ये भीमबहादुर घर्ती असार २८ गते जिल्ला अदालत रुकुम पश्चिममा आफै हाजिर भएपछि २८ गतेको बयान र बहसपछि पुर्पक्षकाे लागि थुनुवामा राख्ने आदेश भएको थियो ।

योसँगै सोती घटनामा संलग्न रहेको आरोपमा पक्राउ परेका ३४ जनामध्ये ३० जनालाई पुर्पक्षकाे लागि थुनुवामा राख्ने आदेश भएको छ । जसमा दुई जना नाबालक रहेको र उनीहरुलाई बाल सुधार गृहमा राख्ने आदेश भएको थियो । 

तीन जना साधारण तारेख र एक जना एक लाख रुपैयाँ धरौटीमा छुटेको जिल्ला अदालत रुकुम पश्चिमले जानकारी दिएको छ ।

जेठ १० गते शनिबार प्रेमिकालाई बिहे गरेर लैजान भन्दै जाजरकोटबाट आएका युवामाथि गाउँलेले आक्रमण गर्दा ६ जनाको ज्यान गएको थियो । जाजरकोट भेरी नगरपालिकाका ४ का नवराज विक, गणेश बुढा मगर, सञ्जु विक, त्यही नगरपालिका ११ का लोकेन्द्र सुनार, गोविन्द शाही र रुकुम पश्चिम चौरजहारी नगरपालिकाका १ का टीकाराम नेपालीको ज्यान गएको थियो । ६ जनाकै शव भेरी नदीमा भेटिएको थियो ।