काठमाण्डाै – काठमाण्डाै लगायत तराईका जिल्लामा कोरोना भाइरसकाे सङ्क्रमण र सङ्क्रमितको सङ्ख्या बढ्दै गएकाले बिरामीलाई वर्गीकरण गरेर मात्रै अस्पतालमा शय्या दिन स्वास्थ्य तथा जनसङ्ख्या मन्त्रालयले आग्रह गरेको छ ।

गम्भीर बिरामीले अस्पतालमा शय्या नपाउने र सामान्य अवस्थाका बिरामीले शय्या ओगट्ने गरेको पाइएकाले अब लक्षण नभएका बिरामीलाई आइसाेलेशनमा राख्ने र गम्भीर बिरामीलाई मात्रै अस्पतालको शय्यामा राख्ने निर्णय गरको स्वास्थ्य मन्त्रालयका प्रवक्ता डाक्टर जागेश्वर गौतमले बताउनुभयो ।

बिरामी भर्नामा मन्त्रालयको कुनै अवरोध नभए पनि गम्भीर बिरामीलाई अस्पतालमा शय्या दिन र सामान्य बिरामी होम आइसोलेशनमा बस्न उहाँको आग्रह छ ।

पछिल्लाे २४ घण्टामा काठमाण्डाै उपत्यकामा दुई सय २४ सहित देशैभर सात सय ४३ जनामा काेराेना भाइरसकाे सङ्क्रमण पुष्टि भएकाे छ । याेसँगै नेपालमा काेराेनाका सङ्क्रमितकाे कुल सङ्ख्या ३२ हजार ६ सय ७८ पुगेकाे छ ।