काठमाण्डौ – काठमाण्डौ उपत्यकाका तीन जिल्लामा एकैदिन तीन सय एक जनामा कोरोना भाइरसको सङ्क्रमण पुष्टि भएको छ । 

स्वास्थ्य तथा जनसङ्ख्या मन्त्रालयका अनुसार काठमाण्डौमा दुई सय ३० जना, ललितपुरमा ४७ र भक्तपुरमा २४ जनामा कोरोना पुष्टि भएको छ । 

पछिल्लो २४ घण्टामा देशैभर आठ सय ८५ जनामा कोरोनाको सङ्क्रमण पुष्टि भएको छ । 

साथै गएको २४ घण्टामा ११ कोरोनाका सङ्क्रमितको ज्यान गएको मन्त्रालयका प्रवक्ता डाक्टर जागेश्वर गौतमले जानकारी दिनुभयो । उहाँका अनुसार महोत्तरीका तीन, बारा र कैलालीका दुई, मोरङ, भक्तपुर, बाँके र काठमाण्डौमा एक जनाको ज्यान गएको हो । 

अब नेपालमा कोरोना सङ्क्रमणको कारण ज्यान गुमाउनेको सङ्ख्या एक सय ७५ पुगेको छ । 

केही दिनयता काठमाण्डौ उपत्यकासहित देशैभर कोरोनाको जोखिम बढिरहेको छ । यही अवस्थालाई ध्यानमा राखी विभिन्न जिल्लामा निषेधाज्ञा र लकडाउन घोषणा गरिएको छ । 

कोरोनाको जोखिम बढ्दै गएपछि काठमाण्डौ उपत्यकामा निषेधाज्ञाको अवधि थप गरिएको छ । बुधबार रातिसम्म लागू गरिएको निषेधाज्ञाको अवधि एक हप्ताले बढाइएको हो ।