बाँके – बाँकेमा कोरोना भाइरसकाे सङ्क्रमणबाट बिहीबार थप एक ७० वर्षीया वृद्धाको ज्यान गएकाे छ । 

दुवै फोक्सोमा निमोनिया भएपछि शिक्षण अस्पताल नेपालगञ्जमा भर्ना हुनुभएकी नेपालगञ्ज उपमहानगरपालिका ७ की वृद्धकाे बिहीबार बिहान १०ः३० बजे ज्यान गएकाे स्वास्थ्य कार्यालय बाँकेका कोरोना स्रोत व्यक्ति नरेश श्रेष्ठले जानकारी दिनुभयो ।
उहाँका अनुसार श्वासप्रश्वासमा समस्या भएपछि गएकाे भदौ ३ गते बिहान १० बजे नेपालगञ्ज मेडिकल कलेजको शिक्षण अस्पताल नेपालगञ्जमा ती महिलालाई भर्ना गराइएको थियो । 

कोरोनाको लक्षण देखिएपछि स्वाब लिएर परीक्षण गर्दा भदौ ५ गते अपराह्न ३ बजे सङ्क्रमण देखिएको थियो । उपचारकै क्रममा स्वास्थ्य अवस्था बिगिँदै गएपछि भदौ ६ गते राति १० बजे शिक्षण अस्पताल नेपालगञ्जबाट भेन्टिलेटरसहित शिक्षण अस्पताल कोहलपुर सारेर उपचार गर्दा पनि बिरामीको अवस्थामा सुधार नआएपछि बिहीबार बिहान ज्यान गएकाे बताइएको छ । 

प्रमुख जिल्ला अधिकारी रामबहादुर कुरुम्वाङले ज्यान गुमाएकी वृद्धकाे घरपरिवार र नेपाली सेनासँगको समन्वयमा शव व्यवस्थापनको तयारी भइरहेको जानकारी दिनुभयो । यससँगै बाँकेमा कोरोनाबाट ज्यान गुमाउनेकाे सङ्ख्या ६ पुगेकाे छ । 

यसअघि नरैनापुर गाउँपालिका ५ का २५ वर्षीय युवक, वैजनाथ गाउँपालिका ६ की ४६ वर्षीया महिला, कोहलपुर नगरपालिका २ की ७० वर्षीया महिला, नेपालगञ्ज ५ का ६२ वर्षीय पुरुष र नेपालगञ्ज १ का ३७ वर्षीय युवकको कोरोनाबाट ज्यान गइसकेकाे छ ।