काठमाण्डाै – सरकारले कोरोना भाइरसलाई सामान्य तरिकाले लिएर हेलचेक्रयाइँ नगर्न आग्रह गरेको छ । 'मलाई केही हुन्न, म तन्दुरुस्त छु' भन्ने भ्रमका कारण कोरोना भाइरसको सङ्क्रमण झन् फैलिँदै गएकाले यस्ता भ्रम त्याग्न र स्वास्थ्य सावधानी अपनाउन स्वास्थ्य तथा जनसङ्ख्या मन्त्रालयका प्रवक्ता डाक्टर जागेश्वर गौतमको आग्रह छ ।

उहाँले घरबाहिर निस्कँदा सही तरिकाले मास्क लगाए, भिडभाडमा नगए कोरोनाबाट बच्न सकिने बताउनुभयो । खोक्दा, हाच्छिउँ गर्दा र बोल्दा थुकमार्फत कोरोना भाइरसको सङ्क्रमण एक व्यक्तिबाट अर्को व्यक्तिमा सजिलै सर्ने भएकाले खोक्दा, हाच्छिउँ गर्दा नाक, मुख छोप्न र व्यक्ति–व्यक्तिबीचको दुरी कायम राख्न डाक्टर गौतमको सुझाव छ ।

कोरोना भाइरसको सङ्क्रमणबारे भ्रममा बस्नु भन्दा वा भ्रम छर्नु भन्दा कोरोना भाइरसको सङ्क्रमण भइ निको भएका व्यक्तिहरुको अनुभव र भोगाइ सुन्न उहाँको आग्रह छ । कोरोनाको सङ्क्रमणपछि सामाजिक, शारीरिक र मानसिक समस्या शब्दमा बयान गर्नसमेत नसकिने हुँदा सङ्क्रमण रोकथाममा गम्भीर बन्न मन्त्रालयका प्रवक्ता डाक्टर जागेश्वर गौतमले जोड दिनुभयो ।

यस्तै उहाँले सरकारले सीमित स्रोत साधनमा कोरोनाको निःशुल्क पीसीआर परीक्षण गरिरहेको बताउनुभयो । कोरोनालाई केही होइन भन्दै भ्रम छर्ने काम गरे कानुनअनुसार कारबाही हुने पनि उहाँले बताउनुभयो ।

यसै सम्बन्धमा एनेस्थेसिया तथा क्रिटिकल केयरका डाक्टर गाेविन्द गाैतमले काेराेना भाइरसकाे सङ्क्रमण कुनै पनि बेला हुन सक्ने र आइसाेलेशनकाे तयारी गरी राख्न सुझाव दिनुभएकाे छ । 'म भर्खरको ठिटी हो वा ठिटो हो, मलाई के हुन्छ र भन्नु हुँदैन । केही रोग नभएका युवाबाट पनि अरु जोखिम भएकाहरुलाई सङ्क्रमण सार्ने सम्भावना भएकाले सावधानी अपनाउनुपर्छ । अरु विभिन्न रोग लागेका व्यक्तिलाई त झन् हामीले रोग सार्नु हुँदैन', उहाँले भन्नुभएकाे छ ।

 याे पनि पढ्नुहाेस्

कोरोना सङ्क्रमण कुनै पनि बेला हुन सक्छ, होम आइसोलेशनको तयारी गरी राखौँ

---

 पछिल्लाे २४ घण्टामा नेपालमा नाै सय ८० जनामा काेराेना भाइरसकाे सङ्क्रमण पुष्टि भएकाे छ । याेसँगै नेपालमा काेराेना भाइरस सङ्क्रमितकाे कुल सङ्ख्या ४६ हजार दुई सय ५७ पुगेकाे छ ।