काठमाण्डाै – सहरी विकासमन्त्री कृष्णगोपाल श्रेष्ठले कोरोनाविरुद्धको लडाइँ जित्न कडा अनुशासनको पालना गर्न सबैलाई आग्रह गर्नुभएको छ ।

साेमबार शङ्खधर साख्वाको सालिकमा माल्यार्पणपछि आयोजना भएको कार्यक्रमलाई सम्बोधन गर्दै मन्त्री श्रेष्ठले कडा अनुशासनका साथ स्वास्थ्य सुरक्षाका मापदण्ड पालना गर्न आग्रह गर्नुभयो । कोरोना कहरका कारण नजिकबाट कुरा गर्न सक्ने अवस्था नभएको उल्लेख गर्दै उहाँले अनुशासित बनेर स्वास्थ्य सुरक्षाका मापदण्ड पूर्णरुपमा पालना गर्न आग्रह गर्नुभयो ।

उहाँले भन्नुभयो, ‘एक आपसमा नजिकबाट कुरा गर्न चाहन्छाैँ तर टाढाटाढा बस्नुपर्ने अवस्था छ । टाढा बस्दा पनि मुख छोप्नुपर्ने अवस्था छ । सँगै हिँडेको साथीलाई नचिनेर एकछिन मास्क खोल्नुहोस् भन्नुपर्ने बाध्यता छ । कोभिडसँग जुध्न कडा अनुशासनका साथ स्वास्थ्य सुरक्षाका मापदण्ड पालना गर्न जरुरी छ । कोरोनाबाट जोगिने, सङ्क्रमण भइहाल्यो भने पनि नआत्तिने । अब कोरोनासँगै यात्रा गर्नुपर्छ तर नभेटिने गरी ।’

उपत्यका मेयर फोरमका सचिवसमेत रहनुभएका मध्यपुर थिमी नगरपालिकाका मेयर मदनसुन्दर श्रेष्ठले चाडबाड मनाउन घर गएकाहरू उपत्यका फर्किने क्रम सुरु भएकाले सङ्क्रमणको जोखिम अझ बढेको बताउनुभयो । उहाँले मङ्सिर महिनालाई अत्यन्त जोखिमयुक्त महिनाको रुपमा लिएर गम्भीरताका साथ काम गर्नुपर्ने बताउनुभयो ।

केही दिनअघि उपत्यका मेयर फोरमले सरकारलाई छठपछि कडा निषेधाज्ञा  जारी गरी उपत्यकाकाे बढ्दो सङ्क्रमणको दरलाई नियन्त्रणमा ल्याउन आग्रह गरेको थियो ।