रुकुम पश्चिम – रुकुमको आठबीसकोटमा एक किशाेरी बलात्कृत भएकी छिन् । जाजरकोटको नलगाड नगरपालिका १ की १४ वर्षीया किशोरी हिजो बुधवार बेलुका आठबीसकोट नगरपालिका १४ मा बलात्कृत भएको जिल्ला प्रहरी कार्यालय रुकुम पश्चिमले जनाएको छ । 

रुकुममा लागेको मेलाको अवसरमा भलिबल हेर्न जाजरकोटबाट आएकी ती किशोरीलाई आठबीसकोट १४ पिपलचौरका २६ वर्षीय झलक जैसीले बलात्कार गरेको भन्दै पीडितका बुबाले इलाका प्रहरी कार्यालय आठबीसकोटमा निवेदन दिएको जिल्ला प्रहरी कार्यालय रुकुम पश्चिमका प्रहरी निरीक्षक डेकेन्द्र शर्माले बताउनुभयो ।

बलात्कारपछि बेहोस अवस्थामा रहेकी किशाेरीलाई राति नै आठबीसकोटमा रहेको नगर अस्पताल पुर्याइएको थियो । प्रहरी निरीक्षक शर्माका अनुसार उनको अत्यधिक रक्तश्राव भइरहेको छ । 

नगर अस्पतालमा सामान्य उपचारपछि उनलाई थप उपचारका लागि आज दिउँसो नेपालगञ्ज रेफर गरिएको अस्पतालले जनाएको छ । उनको अवस्था गम्भीर छ । घटनाको अनुसन्धान भइरहेको र अभियुक्तको खोजी भइरहेको प्रहरीले जनाएको छ ।