रुकुम पूर्व – रुकुम पूर्वको सिस्ने गाउँपालिका–२ प्वाङको बुर्केसल्ला जङ्गलमा भेटिएका १० वटा सकेट बम डिस्पोज गरिएको छ । हिजाे बिहीवार कालो प्लास्टिकको ड्रमभित्र लुकाइ राखेको अवस्थामा फेला पारिएका सकेट बम आज शुक्रवार डिस्पोज गरिएको हो । 

रुकुमकोटबाट गएको नेपाली सेनाको टोलीले दिउँसो बम डिस्पोज गरेको वडाध्यक्ष जीवन केसीले जानकारी दिनुभयो । कालो ड्रमबाहिर रहेका दुई वटा र ड्रमभित्र रहेका आठ वटा गरी १० वटा सकेट बमलाई नेपाली सेना र नेपाल प्रहरीको टोलीले डिस्पोज गरेको हो । 

हिजाे  दिउँसो बाख्रा चराउन जङ्गलमा गएका स्थानीयवासीले शङ्कास्पद वस्तु देखेपछि वडा कार्यालयमा जानकारी गराएका थिए । पछि वडा कार्यालयले इलाका प्रहरी कार्यालय प्वाङमा खबर गरेको थियो । आज बिहान बम डिस्पोज गर्न जिल्लाबाट नेपाली सेना र नेपाल प्रहरीको टोली गएको थियो । 

सकेट बम विगतको जनयुद्धको क्रममा तत्कालीन नेकपा माओवादीले लुकाएर राखेको हुन सक्ने वडाध्यक्ष केसीले जानकारी दिनुभयो ।