काठमाण्डौ – नेपालीहरुको प्रमुख श्रम गन्तव्य देश कतारबाट रोजगारीका मागमा कमी आएको छ । कतारमा हुन गइरहेको फिफा विश्वकप २०२२ का कारण पछिल्लो समय त्यहाँबाट आउने कामको मागमा कमी आएको नेपाल वैदेशिक रोजगार व्यवसायी संघका अध्यक्ष बिमलप्रसाद ढकालले बताउनुभयो । 

‘नयाँ कामदार लिने कुरामा कतारमा निकै नै कमी छ अहिले’, उज्यालोसँग कुरा गर्दै उहाँले भन्नुभयो, ‘विश्वकप हुने भएपछि त्यहाँको सुरक्षाको हिसाबले भएका कामदारलाई पनि केही समयको लागि बिदामा घर पठाइरहेको छ, फिफा सकिएपछि फेरि फिर्ता बोलाउँछ ।’ तर कामका मागमा कमी आए पनि कतारको रोजगारी ठप्प नै नहुने उहाँको भनाइ छ ।

यस्तै, साउदी अरबमा पनि पहिलेको भन्दा अहिले रोजगारी घटेको उहाँले बताउनुभयो । नेपालबाट कामदार लैजाने र उता भनेअनुसार काममा नलगाउने, समयमा तलब दिन नसक्ने गर्दा त्यहाँबाट रोजगारीको माग केही घटेको उहाँको भनाइ छ ।

यस्तै उहाँका अनुसार, अहिले बढी आउने र बढी जान इच्छुक गन्तव्य देश मलेसिया बनेको छ । अहिले मलेसिया निकै राम्रो श्रम गन्तव्य भएको तर लामो समयसम्म बन्द भएका कारण बीचमा कामदार पठाउन रोकिए पनि अहिले पहिलेकै तुलनामा कामका माग आइरहेको पनि उहाँले जानकारी दिनुभयो ।