चितवन – मापदण्ड पूरा नगरी सञ्चालनमा आएका चितवनका खानेपानी उद्योग बन्द हुने भएका छन् ।

जिल्ला प्रशासन कार्यालय चितवनले पानी उद्योगको पटक–पटक अनुगमन र निगरानी गरेपछि मापदण्ड पूरा नगर्नेलाई बन्द गर्ने तयारी गरेको हो । अनुगमनका क्रममा मापदण्ड पूरा नगरी पानी उत्पादन गरेको भेटिएपछि चितवन प्रशासनले डेढ महिना अगाडि चितवनका १० वटा पानी उद्योगमा सिलबन्दी गरेको थियो ।

बन्द भएका उद्योगलाई मादण्ड पूरा गर्ने सर्तमा असोज २५ गतेसम्मको समय दिएर जिल्ला प्रशासनले खुलाउने अनुमति दिएको थियो । मापदण्ड पूरा गर्ने समय अवधि सकिएकोले पुनः अनुगमन गर्ने बताउदै प्रमुख जिल्ला अधिकारी जितेन्द्र बस्नेतले मापदण्ड पूरा नगर्नेलाई बन्द गराइने बताउनुभयो ।

नेपाल सरकारले गएको वर्षको असोज २६ गते पिउने पानी उत्पादन मापदण्ड निर्देशिका जारी गरेको थियो । निर्देशिकामा कुनै पनि उद्योगले पिउने पानी उत्पादन गर्दा अनिवार्य रुपमा स्वचालित मेशिनबाट बोतल सफा गर्ने, पानी भर्ने तथा बिर्को लगाउने र लेबलिङको काम हुनुपर्ने उल्लेख छ ।

असोज २६ गते निर्देशिका जारी हुँदा ६ महिनाभित्र सबै उद्योगहरुले स्वचालित मेशिन राख्नुपर्ने र नराखे उद्योग बन्द गर्नु पर्ने भनिएको थियो । त्यो मिति चैत्र २६ मै सकिएको हो ।