काठमाण्डाै – नेपालको नेतृत्वदायी रेमिटेन्स सेवा प्रदायक कम्पनी आईएमई र मध्यपूर्व लगायत १ सय ५५ वटा देशमा सञ्चालनमा रहेको अस्ट्र टेकद्वारा प्रवर्धित बोटिम अल्ट्रा एपमार्फत नेपालमा रकम पठाउन र डिजिटल रेमिटेन्स सेवा प्रवर्धन गर्ने समझदारी भएको छ ।

सम्झौताअनुसार यूएईको केन्द्रीय बैंकबाट इजाजत पत्र प्राप्त लोकप्रिय बोटिम अल्ट्रा एपमार्फत आईएमईको डिजिटल वालेट आईएमई पेमा सोझै रकम पठाउन सकिने गरी डिजिटल रेमिटेन्सलाई प्रवर्धन गर्न दुवै पक्षले सहकार्य गर्नेछन् ।

यस रणनीतिक सहकार्यमार्फत डिजिटल वित्तीय समावेशीतालाई थप प्रवर्धन गर्दै कारोबारको डिजिटल रूपान्तरणमा ठूलो सहयोग पुग्नुका साथै आईएमईका सेवाग्राहीलाई अत्याधुनिक सूचना प्रविधिमा आधारित वित्तीय सेवा प्रदान गर्ने आईएमईको उद्देश्य हासिल गर्न सहयोग पुग्ने आईएमईका प्रमुख कार्यकारी अधिकृत खिलेन्द्र पौडेलले उल्लेख गर्नुभयो ।

अस्ट्र टेकका प्रमुख व्यापार अधिकृत मार्क मिशेलले आईएमई नेपालसँगको साझेदारीबाट उत्साहित रहेको बताउँदै वित्तीय सेवालाई सबैका लागि थप पहुँचयोग्य बनाउन  महत्त्वपूर्ण कदम रहेको उल्लेख
गर्नुभएकाे छ । यो रणनीतिक साझेदारी यूएई र त्यसभन्दा बाहिर समेत आर्थिक समावेशीता प्रवर्धन गर्न केन्द्रित रहेको प्रमुख व्यापार अधिकृत मिशेलकाे भनाइ छ ।