अमेरिकाले चन्द्रमामा सफलतापूर्वक मानिससहितको यान अवतरण गराएको पाँच दशकपछि फेरि अर्को यान पठाएको छ । सन् १९७२ मा चन्द्रमामा मानिस अवतरण गराउन सफल भएको अमेरिकाले आज फेरि अर्को अन्तरिक्ष यान सफलतापूर्वक प्रक्षेपण गरेको बीबीसीले जनाएको छ ।

नयाँ रकेट युनाइटेड लन्च एलायन्स (यूएलए) को भुल्कान सेन्टौरले फ्लोरिडाको केप क्यानाभेरल स्पेस फोर्स स्टेशनबाट स्थानीय समयअनुसार बिहान २ बजेर १८ मिनेटमा आफ्नो यात्रा शुरु गरेको छ । योजनामा समस्या नआएमा आउँदो फेब्रुअरी २३ मा चन्द्रमाको मध्य अक्षांश क्षेत्रमा यान अवतरण हुनेछ । यो अभियानका लागि अमेरिकी अन्तरिक्ष एजेन्सी नासाले एक अर्ब अमेरिकी डलरभन्दा धेरै भुक्तानी दिएको छ ।

चन्द्रमाको सतहमा पहिलो पटक सोभियत सङ्घले सन् १९६६ मा यान अवतरण गराएको थियो । पछिल्लो एक दशकमा चीनले तीन पटक सफलतापूर्वक अवतरण गरेको छ । अघिल्लो वर्ष भारतले पनि अन्तरिक्षमा यान अवतरण गराएको छ । नासाले यही दशकको अन्त्यसम्ममा चन्द्रमामा अन्तरिक्षयात्रीहरूलाई अवतरण गराउने प्रयासमा रहेको जनाएको छ ।