काठमाण्डाै – प्रधानमन्त्री कप राष्ट्रिय क्रिकेट प्रतियाेगितामा मधेस प्रदेशले सुदूरपश्चिम प्रदेशलाई हराएकाे छ । कीर्तिपुरको त्रिवि क्रिकेट मैदानमा आज भएको खेलमा मधेसले सुदूरपश्चिमलाई ८० रनले हरायो ।

मधेसले दिएको ३ सय २० रनको लक्ष्य पछ्याएको सुदूरपश्चिम ४४ ओभर ५ बलमा २ सय ३९ रनमा अल आउट भयो । सुदूरपश्चिमका नरेन भट्टले शतक बनाए । नरेन १ सय २२ बलमा १ सय २१ रन बनाएर आउट भए । मधेसका राजेश यादव र पवन सर्राफले समान ३ विकेट लिए ।

यसअघि टस जितेर ब्याटिङ गरेको मधेसले ५० ओभरमा ९ विकेट गुमाएर ३ सय १९ रन बनायो । मधेसका मयन यादवले शतक बनाए । मयन १ सय २८ बलमा १ सय १५ रन बनाएर आउट भए । यस्तै पवन सर्राफले ७० रन बनाए । सुदूरपश्चिमका शेर मल्लले ४ विकेट लिए ।

यो जितसँगै मधेस ६ खेलमा ८ अङ्कसहित तेस्रो स्थानमा छ । सुदूरपश्चिम ४ खेलमा ६ अङ्कसहित चौथो स्थानमा छ ।