काठमाण्डाै – राष्ट्रिय मानव अधिकार आयोगले कारागारभित्र ठाउँ अभावका कारण काेराेना फैलिने जाेखिम रहेकाले आपत्कालीन संरचना निर्माण गरी दुरी कायम गर्न सरकारलाई आग्रह गरेको छ ।

कारागार अनुगमन प्रतिवेदन साेमबार सार्वजनिक गर्दै आयोगले कोरोना भाइरसको प्रकोप कारागारमा देखिएकाले दुरी कायम गर्न व्यवस्था गर्न आग्रह गरेको आयोगका प्रवक्ता वेद भट्टराईले जानकारी दिनुभयो ।

कोभिड–१९ महामारीको अवस्थामा आयोगबाट सातै प्रदेशका २८ जिल्लाका कारागारको अनुगमन आयोगले गरेको थियो ।

आयोगले अनुगमनमा कोभिड–१९ बाट कारागारमा रहेका कैदीबन्दी, सुरक्षाकर्मी तथा कर्मचारीमा हुन सक्ने सङ्क्रमण जोखिमलाई कम गर्न अपनाउनुपर्ने सावधानीका लागि अत्यावश्यक मास्क, स्यानिटाइजर, पन्जा, फेस शिल्ड, साबुन, ज्वरो नाप्ने यन्त्र, पीपीई सेटलगायतका सामग्रीका लागि तत्काल बजेट व्यवस्थापन गर्न सरकारलाई आग्रह गरेकाे छ ।

साथै आयाेगले कोभिड–१९ महामारीबाट थुनुवा, कैदीबन्दी सुरक्षित राख्न र सबै कारागारका लागि पूर्वतयारी तथा प्रतिकार्य प्रयोजनका लागि एक एकीकृत निर्देशिका जारी गरी कार्यान्वयन गर्न सरकारलाई आग्रह गरेको छ ।