ललितपुर – ललितपुर महानगरपालिकालाई सुन्दर र सफा बनाउने अभियान चलाएको नगर प्रहरीले फुटपाथ अतिक्रमण गरी पसल राख्नेलाई भोलि (साेमबार) देखि कारबाही गर्ने भएको छ ।महानगरपालिकाभित्रका सडक छेउ र फुटपाथमा जुनसुकै पसल राख्नेलाई कारबाही गरिने नगर प्रहरी प्रमुख सीताराम सीताराम हाछेथुले बताउनुभयो । 

अभियानको पहिलो चरणमा दुई महिनासम्म फुटपाथमा पसल गर्नेलाई सम्झाइबुझाइ गरेर पसल हटाउन लगाएको र अब दाेस्रो चरणमा अटेर गर्नेलाई कारबाही स्वरुप जरिबाना तिराउने उहाँले जानकारी दिनुभयो । यस्तै तेस्रो चरणमा फुटपाथमा पसल राखेको पाइएमा सामान नै जफत गरिदिने उहाँले बताउनुभयो । 

हाछेथुका अनुसार साइकलमा पसल गर्नेलाई दुई हजार रुपैयाँ र ठेलागाडामा पसल गर्नेलाई तीन हजार रुपैयाँ जरिबाना गरिने छ । यसैगरी सामानको मूल्यअनुसार कारबाही अघि बढाइने नगर प्रहरीले जनाएको छ ।

ललितपुर महानगरपालिकाको नगर प्रहरी बलले महानगरलाई स्वच्छ र सुन्दर बनाउने अभियानमा होर्डिङ बोर्ड हटाउने, फुटपाथ अतिक्रमण गरी राखिएका विभिन्न पसल हटाउने काम गरिरहेको छ ।

योसँगै नगर प्रहरीले विभिन्न ठाँउमा सडक अतिक्रमण गरी बनाइएका टहरा पनि हटाइरहेको छ ।