महोत्तरी – गएकाे वर्ष नै जलेश्वर अस्पतालमा भेन्टिलेटर जडान गरिएकाे भएपनि अहिलेसम्म सञ्चालनमा आउन सकेको छैन । कोरोना सङ्क्रमित बिरामीका लागि गएकाे वर्ष प्रदेश सरकारले जलेश्वर अस्पतालमा जडान गरेको पाँच भेन्टिलेटर सञ्चालनमा नआएका हुन् । 

भेन्टिलेटर सञ्चालनमा नआउँदा बिरामीले अकालमै ज्यान गुमाउनु परेकाे छ । दुई करोड रुपैयाँभन्दा बढीको लागतमा प्रदेश सरकारले जडान गरेको भेन्टिलेटर दक्ष जनशक्तिको अभावमा सञ्चालनमा आउन नसकेको जलेश्वर अस्पतालका कोभिड फोकल पर्सन प्रतिभा सिंहले जानकारी दिनुभयो ।   

दरबन्दीअनुसारको चिकित्सक व्यवस्थापन नहुँदा अहिले पनि याे अस्पताल हेल्थ असिस्टेन्टको भरमा सञ्चालन भइरहेकाे काेभिड फोकल पर्सन सिंहले बताउनुभयो । तीन जना एमबीबीएस स्तरका चिकित्सककाे दरबन्दी कायम रहेको अस्पतालमा अहिले एमबीबीएस स्तरका एक जना डाक्टर (शतिश साह) हुनुहुन्छ । निमित्त सुपरिन्टेन्डेन्ट समेत रहनुभएकाका डा. सिंहकाे धेरैजसाे समय भर्चुअल बैठक, तालिम, गोष्ठी र भेटघाटमा खर्च हुँदै आएकाे छ । 

अस्पताल व्यवस्थापन एवम् सुधारका लागि चालेको कदम असफल भएपछि गएकाे जेठ ५ गतेदेखि आमरण अनसनमा बस्ने तयारी भएको अस्पताल व्यवस्थापन समितिका अध्यक्ष सुरेश पाण्डेले बताउनुभयाे । आफू अध्यक्ष भएयता याे अस्पताल अनुगमनका क्रममा आएका सङ्घीय सरकारका मन्त्री, प्रदेश सरकारका मन्त्री, सांसद, विभिन्न दलका नेताले अस्पताल सुधार गर्न दिएको आश्वासन पूरा नभएकाे उहाँकाे भनाइ छ ।