मकवानपुर – वाग्मती प्रदेशलाई साक्षर प्रदेश घोषणा गरिएको छ । प्रदेशको सामाजिक विकास मन्त्रालयले आज सोमवार यस प्रदेशलाई साक्षर प्रदेश घोषण गरेको हो । 

प्रदेशकी मुख्यमन्त्री अष्टलक्ष्मी शाक्यले वाग्मती साक्षर प्रदेश भएको घोषणा गर्नुभयो । कार्यक्रममा मुख्यमन्त्री शाक्यले साक्षर अभियानलाई सिर्जनात्मक रूपले अगाडि बढाउने बताउनुभयो । 

पहिले महिलाहरूले बेलुकाको समयमा मात्र प्रौढ कक्षा पढ्नुपर्ने बाध्यता भए पनि अहिले त्यो समस्या हटेकाले अब सबै नागरिक साक्षर बन्नुपर्ने मुख्यमन्त्री शाक्यले बताउनुभयो । साक्षर घोषणाको काम सकिए पनि यसको कार्यान्वयन गर्न लाग्नुपर्ने उहाँको भनाइ छ । 

प्रदेशका सामाजिक विकास मन्त्री विजय सुवेदीको अध्यक्षतामा भएको कार्यक्रममा प्रदेशका मन्त्रीहरू, सचिवहरू, मन्त्रालय र निर्देशनालयका कर्मचारी लगायतको सहभागिता रहेको थियो ।