मलेसियाले प्यालेस्टिन र हमास समूहसँग सम्बन्ध राख्ने यसअघिको निर्णयलाई यथावत् राख्ने भएको छ । मलेसियाका प्रधानमन्त्री अनवर इब्राहिमले आफ्नो राष्ट्रले हमाससँग सम्बन्ध कायम राख्ने र दण्ड नदिने बताउनुभएको बीबीसीले जनाएको छ ।

संसद्‍लाई सम्बोधन गर्दै प्रधानमन्त्री अनवरले अहिले इजरायलले हमासविरुद्ध गरिरहेको नरसंहारको सबैले खुलेर विरोध गर्नुपर्ने पनि बताउनुभएको छ ।

अमेरिकी प्रतिनिधिसभाले गएकाे हप्ता हमास र प्यालेस्टिनी इस्लामिक जिहादका विदेशी समर्थकहरूलाई प्रतिबन्ध लगाउने पक्षमा मतदान गरेपछि विपक्षी सांसदले अनवरलाई मलेसियाली सरकारको अडानबारे सोधेका थिए । प्रश्नको जवाफ दिँदै उहाँले अमेरिकाको कुनै पनि धम्की स्वीकार नगर्ने बताउनुभएको खबरमा उल्लेख छ । उहाँले आफ्नो देशले संयुक्त राष्ट्र सङ्घको महासभाले गरेको निर्णय मान्ने भन्दै प्यालेस्टिनको अस्तित्व समाप्त पार्ने कदम मान्य नहुने उल्लेख गर्नुभएको छ ।

मुस्लिम बहुल राष्ट्र मलेसियाले लामो समयदेखि प्यालेस्टिनी मुद्दाको वकालत गर्दै आएको छ । मलेसियाले इजरायललाई कुटनीतिक रूपमा मान्यता दिएको छैन । अहिले इजरायलले गाजामा गरेको हमलाविरुद्ध दिनहुँजसो मलेसियामा प्रदर्शन हुँदै आएको छ ।