काठमाण्डाै – काठमाण्डाै महानगरपालिकाको वडा नम्बर ८ ले १९९० सालको भूकम्पपछि हराएको जय बागेश्वरी नवाली टोलको ‘ग्वलः दे फल्चा’ खोजेर पुनरुत्थानको काम शुरु गरेको छ ।

फल्चा पुननिर्माण गर्न हिजो वडाध्यक्ष आशामान सङ्गतले जग पूजा तथा शिलान्यास गर्नुभयो । घरको भित्तामा पाइएको शिलापत्र अध्ययन र झन्डै ५० सालतिर तयार पारिएको विवरण पुस्तिकाको फोटो हेरेर फल्चा पुनरुत्थान गर्ने निर्णय गरेको वडाध्यक्ष सङ्गतले बताउनुभयो ।

शिलापत्रमा फल्चाको निर्माण नेपाल संवत् ८२० मा र पुनर्निर्माण ८७३ मा भएको उल्लेख छ । यसअनुसार फल्चा झन्डै तीन सय २४ पुरानो हो । स्थानीय पाका मानिसहरूका अनुसार ९० सालको भूकम्पपछि फल्चा हराएको थियो । पशुपति क्षेत्रलाई पहिले ग्वलः दे अर्थात् ग्वल देश भनिन्थ्यो ।

फल्चा पुनरुत्थानका लागि वडाले झन्डै १५ लाख रुपैयाँ खर्च गर्नेछ । फल्चा १४ फिट लम्बाइ र साढे छ फिट चौडाइको हुनेछ ।