बलिउड अभिनेतृ कंगना रनावतले एकपटक फेरि आलिया भट्टलाई निशाना बनाएकी छिन् । यसअघि पनि आलियाविरुद्ध मिडियासामु आफ्नो रिस पोखिसकेकी कंगनालो अहिले फेरि आलियाका बारेमा निकै दुख लाग्दो बयान दिएकी छिन् ।

कंगनाले सन् २०१९ का फिल्महरुको कुरा गर्ने क्रममा ‘गली ब्वाय’ मा आलिया भट्टको अभिनय औसत रहेकाले उनीसँग आफ्नो तुलना नगर्न भनेकी छिन् । कंगना रनावत यस वर्ष फिल्म ‘मणिकर्णिका’ मार्फत दर्शकमाझ आएकी थिइन् । 

एक भारतीय अनलाइनले २०१९ को पहिलो ३ महिनामा रिलिज भएका फिल्मकी अभिनेतृहरुबीच कसको अभिनय उत्कृष्ट भनेर एउटा जनमत बटुलेको थियो । जसमा ‘मणिकर्णिका’ बाट कंगना रनावत र ‘गली ब्वाय’ बाट आलिया भट्टको नाम राखिएको थियो । जसको नतिजामा अभिनेत्री कंगना रनावतले आलिया भट्टलाई पछि पार्दै सबैभन्दा धेरै भोट पाएकी थिइन् ।

यसैको प्रतिक्रियाका लागि कंगनासँग कुरा गर्दा उनले आलियाको खिल्ली उडाउँदै भनेकी छिन्, ‘यो एकदमै लाजमर्दो कुरा हो । ‘गली ब्वाय’मा आलियाले मलाई पछि पार्नेजस्तो के अभिनय गरेकी छिन् ? त्यही धेरै बोल्ने रिसालु केटी...एक स्वतन्त्र र सशक्त महिलालाई देखाउने बलिउडको पुरानो फर्मुला.. कृपया मलाई आलियासँग तुलना गरेर लज्जित नबनाउनुहोस । मिडियाले यी फिल्मी बच्चाहरुलाई चाहिनेभन्दा बढी नै माया दिएको छ । यिनीहरुको औसत कामको सराहना गर्न बन्द गर्नुहोस् । होइन भने अभिनयको दर्जा कहिल्यै अगाडि बढ्न पाउनेछैन ।’

अभिनेत्री कंगना रानावतको यस किसिमको बयानपछि आलिया भट्टले कस्तो प्रतिक्रिया दिनेछिन् त्यो हेर्न बाँकी नै छ । यतिबेला आलिया फिल्म ‘कलंक’ को प्रमोशनका व्यस्त छिन् । यसपछि उनी अभिनेता रणबिर कपूरसँगकाे फिल्म ‘ब्रह्मास्त्र’ मार्फत दर्शक माझ आउनेछिन् ।

यसबाहेक बाहुबली निर्देशक एसएस राजामौलीको फिल्म ‘आर आर आर’, सञ्जय लीला भन्साली र सलमान खानको फिल्म ‘इन्शाअल्लाह’ र उनकै होम प्रोडक्शनको फिल्म ‘सडक २’ लगायतका फिल्ममा पनि आलिया भट्टको मुख्य अभिनय रहनेछ ।