खोटाङ – खोटेहाङ गाउँपालिकाको खोटाङ बजारमा रहेको क्वरेण्टीनमा बसेका कोरोना सङ्क्रमितलाई मनोसामाजिक परामर्श प्रदान गरिएको छ ।

क्वरेण्टीनमा रहँदा सङ्क्रमितहरूमा डर, चिन्ता र त्रासजस्ता मनोसामाजिक समस्या देखिएपछि खोटेहाङ गाउँपालिकाले मनोसामाजिक परामर्श प्रदान गरेको हो । 

भारतबाट घर फर्किएकासहित क्वेण्टीनमा १२ जना कोरोना सङ्क्रमित रहेको गाउँपालिकाले जनाएको छ । उनीहरूलाई गाउँपालिकाको नेतृत्वमा सञ्चालित सुरक्षित आप्रवासन परियोजना सामीलाई प्राविधिक सहयोग उपलब्ध गराइरहेको सीएमसी नेपालको मनोसामाजिक परामर्शकर्ताले सामूहिक रूपमा परामर्श प्रदान गरेका हुन ।

सुरक्षित आप्रवासन परियोजना सामी खोटाङमा दिक्तेल रुपाकोट मझुवागढी नगरपालिका, खोटेहाङ गाउँपालिका र केपिलाशगढी गाउँपालिकाको नेतृत्वमा सेवा प्रदायक संस्था बाल सेवा समाज नेपालद्वारा सञ्चालन भइरहेको छ ।

महामारीको यो विषम परिस्थितीमा खोटाङमा टेलिफोनमार्फत र स्वास्थ्यका मापदण्ड पालना गरी क्वरेण्टीनस्थलमै गई सङ्क्रमितलाई समेत मनोपरामर्श प्रदान गरिँदै आएको छ ।