महाेत्तरी – महोत्तरी प्रहरीले सम्सीमा डकैती भएको चार महिनापछि घटनाका मुख्य योजनाकारलाई पक्राउ गर्न सफल भएकाे छ । 

सम्सी गाँउपालिका १ पर्सा देवाडमा भएको डकैती घटनामा संलग्न रहेको आरोपमा प्रहरीले सर्लाही लालबन्दी नगरपालिका २ पुनर्वासका ४२ वर्षीय विश्वनाथ पासवानलाई पक्राउ गरेको हो ।
सोनमा गाँउपालिका ३ बाट पक्राउ गरेका पासवानलाई बिहीवार जिल्ला प्रहरी कार्यालय महोत्तरीले जलेश्वरमा पत्रकार सम्मेलन गरेर सार्वजानिक गरिएको हो । 

प्रहरीका अनुसार पासवानलगायतका हतियारधारी समूहले गएकाे असार ३ गते राति स्थानीयवासी वीरेन्द्र साहले आफ्नै घरमा सञ्चालन गर्दै आएका सुन पसलमा डकैती गरेकाे थियाे ।

याे समूहले घरभित्र प्रवेश गरी नगद आठ लाख ९७ हजार दुई सय रुपैयाँ र सुनचाँदीका गरगहना लुटेर लगेका थिए । याे समूहले सञ्चालक वीरेन्द्र साहको ढाडमा गोली प्रहार गर्नुका साथै उहाँकी श्रीमती सुशीला, छोराहरू शम्भु र राजीव तथा छोरी कन्चनलाई रड प्रहार गरी घाइते बनाएको जिल्ला प्रहरी कार्यालय महोत्तरीले जनाएको छ ।