काठमाण्डौ – रोजगारीको प्रलोभनमा न्युजिल्याण्ड पुगेर ठगिने क्रम बढेको छ ।

पछिल्लो समय नेपालबाट भिजिट भिसामा न्युजिल्याण्ड रोजगारीमा पठाइदिने भन्दै लाखौँ रुपैयाँ असुल्ने र त्यहाँ पुगेकाहरू पनि ठगीमा परेर दूतावासमा सम्पर्क गर्नेहरू बढेको त्यहाँ रहेको नेपाली अवैतनिक वाणिज्य दूतावासले जनाएको छ । 

न्युजिल्याण्ड पुगेकाहरूलाई म्यानपावर कम्पनी र एजेण्टहरुले मोटो रकम लिएर भिजिट भिसामा ल्याएको दूतावासले जनाएको छ । तर भिजिट भिसामा गएकाहरूले न्युजिल्याण्डमा काम गर्ने अनुमति नहुने भन्दै वाणिज्य दूतावासले सबैलाई सचेत समेत गराएको छ । 

कोही कसैले न्युजिल्याण्डमा भिजिट भिसामा काम लगाइदिन्छ भनेमा उनीहरूको कुरामा विश्वास नगर्न र बेलैमा सचेत हुन वाणिज्य दूतावासले अनुरोध गरेको छ । न्युजिल्याण्ड पठाइदिने भन्दै रकम असुलेर फरार भएको भन्दै विभाग पनि उजुरीहरू पर्ने क्रम बढ्दो छ ।

वैदेशिक रोजगारीमा जान संस्थागत र व्यक्तिगत गरी दुई तरिकाले जान सकिन्छ । तर सरकारसँग अनिवार्य श्रम स्वीकृति लिनु पर्छ र श्रम स्वीकृति लिन काम गर्ने भिसामा नै विदेश जान पर्छ । भिजिट भिसा भनेको घुम्ने भिसा भएकाले घुम्ने भिसामा पर्यटकको रूपमा कुनै पनि देश पुगेर काम गर्ने वा कमाउने सपना बुन्दा ठगीमा पर्ने सम्भावना बढी हुन्छ ।