रौतहट - सानै उमेरमा परिवारले गरिदिन लागेको विवाह रोक्ने किशोरी हुन्, नुरसना खातुन र दुर्गा शर्मा । रौतहटको परोहाकी नुरसना र ईशनाथ नगरपालिकाकी र दुर्गाले आफ्नो विवाह रोक्न ठूलो संघर्ष गर्नुपर्‍यो ।

वडाध्यक्ष, प्रहरी र आफूजस्तै किशोरीको सहयोगमा दुर्गाले दुई पटक (२०७५ साउन ४ र २०७६ असार १३) र नुरसनाले एक पटक (२०७५ माघ २२) विवाह रोक्न सफल हुनुभयो ।

नुरसनाले अरु तीन जना किशोरीको पनि विवाह रोक्नुभएको छ । उहाँको पहलमा १३, १४ र १५ वर्षका सञ्जिदा, समिरा र अप्सनाको गएको असारमा हुन लागेको विवाह रोकिएको हो ।

बालविवाह गर्न र गराउन हुन्न भन्दा उहाँहरुले उत्तिकै डर, त्रास र गाली सहनुपर्यो ।

अहिले उहाँहरुका परिवार पनि बिहे रोकिएकोमा खुशी छन् । १५ वर्षीया नुरसना र १८ वर्षीया दुर्गाले गाउँमा सञ्चालन भएको सामुदायिक छलफल केन्द्रमा आवद्ध भएपछि उहाँहरुले कम उमेरमा हुन लागेकाे आफ्नो विवाह पनि रोक्नुभयाे भने आफूजस्तै अरु किशोरीको विवाह रोक्ने अभियान पनि चलाइरहनु भएकाे छ।