काठमाण्डाै – लकडाउनका कारण यतिबेला देशैभरि सडकमा हुने गतिविधि ठप्प जस्तै छन् । तर यही मौकामा सडक विभागले सडक मर्मत र पुल निर्माणलाई तीव्र बनाएको छ ।

लकडाउनको अवधिमा ५० वटा पुलको ढलान भएको छ । लकाडाउनभन्दा अघि सक्नुपर्ने काम भए पनि यो काम लकडाउन अवधिमा गरिएको हो । लकडाउनका कारण कामदार अभाव हुँदा पुल निर्माणको काम अझ केही पर धकेलिएको थियो ।

अझै केही सङ्ख्यामा बन्न लागेका पुल ढलानको काम बाँकी रहेको छ । प्रिमनसुन सुरु भएसँगै देशका विभिन्न ठाउँमा पानी परिरहेकाले खोलाको बहाब बढ्न थालेको छ । जसले गर्दा पुलमा लगाएका टेकाहरु बगाउने जोखिम रहेको सडक विभागका महानिर्देशक केशव शर्माले बताउनुभयो ।

सडक विभागले जुम्ला, सङ्खुवासभा, मोरङ, भरतपुर, दाङलगायतका केही ठाउँका सडकको मर्मत सम्भार गरेकाे महानिर्देशक शर्माले जानकारी दिनुभयो ।

यही समयमा काठमाण्डौको चावहिलदेखि गौशालासम्मको सडकखण्डको काम गरिने भने पनि सडकमा राख्नका लागि आवश्यक रोडा, गिट्टीको अभावले काम हुन नसकेको उहाँले जानकारी दिनुभयो । उहाँले भन्नुभयो, 'सडकका लागि आवश्यक सामग्री दोलालघाटबाट ल्याउन स्थानीयले नदिएपछि काम रोकिएको हो, यो सडकखण्डमा पानीको पाइप बिछ्याउने काम भने भइरहेको छ ।'

लकडाउनका बेला काम गर्नका लागि सडक विभागले कामदारलाई क्याम्पमा राखेर काम अघि बढाइरहेको छ भने केही जिल्लामा विभागको समन्वयमा कामदार खटाइरहेको छ । तर लकडाउनका बेला पनि सडक मर्मतका लागि विभागले बाहिरबाट कामदार ल्याएको भन्दै केही ठाउँमा स्थानीयले विरोध गरेको महानिर्देशक शर्माको भनाइ छ ।