नासाले महासागरको जलस्वास्थ्य, वायुको गुणस्तर र मानवताको अनुकूलनताका लागि बदलिँदो मौसमका प्रभावहरू अध्ययन गर्न नयाँ उपग्रह प्रक्षेपण गरेको छ । पेस नाम दिइएको उपग्रह एउटा रकेटमा अमेरिकाको फ्लोरिडामा रहेको केप क्यानाभेरल स्पेस फोर्स स्टेशनबाट हिजो प्रक्षेपण गरिएको हो ।

प्रक्षेपण भएको पाँच मिनेटपछि यो उपग्रहबाट सूचना प्राप्त गर्न शुरु गरेको नासाले बताएको चिनियाँ सञ्चारमाध्यम सिन्ह्वाले जनाएको छ । नासाका अनुसार पेस मिसनले साना, प्रायः अदृश्य चीजहरू जस्तै पानीमा शूक्ष्म जीवन र पृथ्वीको सयौँ माइल माथिबाट हावामा शूक्ष्म कणहरूको प्रभावको बारेमा अध्ययन गर्नेछ ।

यस कार्यक्रमबाट स्याटेलाइटको हाइपरस्पेक्ट्रल ओशन कलर इन्स्ट्रुमेन्टले अन्वेषकहरूलाई पराबैंजनी देखिने र नजिकको इन्फ्रारेड प्रकाशको स्पेक्ट्रममा महासागरहरू र अन्य जल गतिविधिको मापन गर्न सहज हुने खबरमा उल्लेख छ ।  

यसमार्फत वैज्ञानिकहरू र तटीय स्रोत प्रबन्धकहरूले मत्स्यपालनका लागि पानीको  स्वास्थ्य पूर्वानुमान गर्न, हानिकारक लेउहरु निकाल्न र समुद्री वातावरणमा देखिने परिवर्तनहरू पहिचान गर्न डेटा प्रयोग गर्न सक्ने पनि बताइएको छ । स्थानीय, क्षेत्रीय र विश्वव्यापीरूपमा विकसित वायुको गुणस्तर मापन गर्न पनि पेस  प्रविधिले सजिलो बनाउने  नासाले जनाएको छ ।