यूएई – यूएईमा हुनुहुन्छ र भिसा सकिएर वा नेपाल फर्किन नपाएर समस्यामा पर्नु भएको छ भने नआत्तिनुहोस् । तपाईँंको कम्पनीले काम नदिएकोले खान बस्न समस्या भएको छ भने पनि सिधै आबुधाबीमा रहेको नेपाली दूतावासमा सम्पर्क गर्नुहोस् ।

दूतावासले समस्या समाधानमा सहयोग गर्ने भएको छ । यूएई सरकारले कोरोनाको कारण उत्पन्न परिस्थितीले कुनै पनि देशका नागरिकलाई समस्या पर्न नदिने र परेकालाई सम्बन्धित देशको दूतावासमार्फत समस्याको सम्बोधन गर्ने बताएको यूएईका लागि नेपाली राजदूत कृष्णप्रसाद ढकालले बताउनुभयो ।

समस्यामा परेका नेपालीको संख्या दैनिक बढेकोप्रति दूतावासले आइतबार यूएईको पररास्ट्र मन्त्रालयमार्फत कुटनैतिक पत्राचार गरेको थियो । पत्रचारपछि सोमबार यूएईका विभिन्न निकायमा सम्पर्क गरेर समस्यामा परेका नेपाली नागरिकका विषयमा कुरा उठाएको र दूतावासमार्फत नै यसको समाधान गरिने पनि उहाँले बताउनुभयो।

दूतावासले त्यसरी समस्यामा परेका नेपाली नागरिकसँग विभिन्न माध्यममार्फत सम्पर्क गर्ने, उनीहरुको तथ्यांक राख्ने र समाधानका लागि सम्बन्धित निकायसँग समन्वय गर्ने गरी श्रम काउन्सिलर निर्मला थापालाई सम्पर्क व्यक्ति तोकेर काम गरिरहेको छ ।

कोरोनाका कारण उत्पन्न कुनै पनि परिस्थितीले समस्यामा परेको भए दूतावासको सम्पर्क नम्बर, दूतावासको फेसबूक पेज, सामाजिक संघसस्था तथा जुनसुकै माध्यममार्फत पनि सम्पर्क गर्न दूतावासले अनुरोध गरेको छ ।