बाँके – नेपालगञ्ज उपमहानगरपालिका वडा नम्बर १२ को कार्यालयलाई आइसाेलेशन वार्ड बनाइएको छ । चार महिला र १० पुरुषलाई राख्न सकिने गरी १४ शय्याकाे अस्थायी आइसोलेशन तयार गरिएको वडाध्यक्ष बुद्धिसागर सुवेदीले जानकारी दिनुभयो ।

नेपालगञ्ज उपमहानगरपालिकाका मेयर डाक्टर धवलशम्शेर राणा र उपमेयर उमा थापा मगरले बिहीवार वडा कार्यालयमा बनाइएकाे आइसाेलेशन वार्डकाे उद्घाटन गर्नुभयो । कार्यक्रममा मेयर राणाले कोभिड १९ सङ्क्रमण अन्त्य हुने निश्चित नभएका कारण भविष्यमा आइपर्न सक्ने अवस्थालाई मध्यनजर गर्दै तयारी गर्नुपर्ने बताउनुभयो । वडा कार्यालयमा आइसाेलेशन बनेपछि वडावासीलाई सहज हुने उहाँकाे भनाइ छ । 

वडाअध्यक्ष सुवेदीका अनुसार भाडामा बस्ने र घरमा आइसोलेशनको सहज व्यवस्था हुन नसक्नेका लागि लक्षित गरी आइसोलेशन तयार गरिएको हो । केही दिनमा चिकित्सक र औषधिसहितको घरदैलो अभियान सञ्चालन गरिने पनि कार्यालयले जनाएको छ ।

नेपालगञ्जमा यसअघि वडा नम्बर ४ ले दुई चिकित्सकसहित १० शय्याकाे आइसोलेशन सञ्चालन गरेकाे थियाे ।