काठमाण्डाै - सप्तरीको तिलाठी कोइलाडी गाउँपालिकामा दुईवटा पुल निर्माणको काम अलपत्र परेको छ ।

तिलाठी कोइलाडी गाउँपालिका वडा नम्बर ३ सकरपुरा र वडा नम्बर ७ को मंसापुरमा पुल बनाउने योजना कागजमै सीमित भएकाे स्थानीय बासिन्दाको गुनासो छ । 

सकरपुराको झोलुङ्गे पुल निर्माणका लागि २ करोड ८२ लाख ८० हजार रकम विनियोजन भएकोमा ७० लाख रुपैयाँ निकासा भएको छ । पुल निर्माण लागि उपभोक्ता समिति बनेको तर काम नभएको उपभोक्ता समितिका अध्यक्ष भुपेन्द्र मुखियाले बताउनुभयो । 

पेस्की बापतको बजेट निकासा गरी गाउँपालिकाले आफ्नै खातामा राखेको उहाँको भनाइ छ । यस्तै मंसापुरमा जिता खोलामा बन्नुपर्ने पुलका लागि २९ लाख, १९ हजार रुपैयाँ बजेट बिनियोजन गरिएकोमा कामै नगरि १६ लाख ३७ हजार रुपैयाँ निकासा भएको छ ।

तिलाठी कोइलाडी गाउँपालिकाका अध्यक्ष सतिशकुमार सिंहले कोरोना महामारी तथा बाढीका कारण पुल निर्माण हुन नसकेको बताउनुभएको छ ।