रुकुम पूर्व – रुकुम पूर्वको एक मतदान केन्द्रमा दिउँसाे १२ बजेदेखि मात्र मतदान सुरु भएको छ । पुथाउत्तरगंगा गाउँपालिका २ को पेल्मा प्रावि मतदान केन्द्रमा दिउँसाे १२ बजेर ५ मिनेटदेखि मतदान सुरु भएको जिल्ला निर्वाचन कार्यालय रुकुम पूर्वले जनाएको छ । 

बिहान ७ बजेदेखि नै मतदान सुरु हुनुपर्ने भए पनि दलीय सहमति नहुँदा मतदान सुरु हुन ढिलाइ भएको जिल्ला निर्वाचन अधिकारी तेजकुमार ओलीले जानकारी दिनुभयो ।

दलीय सहमतिमार्फत दिउँसाे १२ बजेर ५ मिनेटमा मतदान सुरु भएको र अहिले शान्तपूर्वक मत खसिरहेकाे उहाँले बताउनुभयो । हिजो बिहीवार दलहरूका बीचमा झडप भएको र त्याे विवादका कारण आज दलीय सहमति नजुट्दा ढिलो गरी मतदान सुरु भएको उहाँको भनाइ छ ।

प्रावि पेल्मा मतदान केन्द्रमा मतदाताकाे सङ्ख्या चार सय ९२ जना रहेको छ ।