रामेछाप – रामेछापको खाँडादेवी गाउँपालिका–१ राकाथुम मतदान केन्द्रमा रहेको क, ख र ग गरी तीनवटा मतदान स्थलको मतदान प्रक्रिया स्थगित गरिएको छ । 

जिल्लाको खाँडादेवी गाउँपालिका–१ राकाथुम मतदान केन्द्रमा मतदान शुरु हुनासाथ नेपाली कांग्रेस र नेकपा माओवादी पार्टीका कार्यकर्ताहरुबीच भएको विवादका कारण मतदान प्रक्रिया अवरुद्ध भएको थियो । मतदान स्थलमा तनाव सिर्जना भएपछि प्रहरीले स्थिति नियन्त्रण लिन ७ राउन्ड हवाई फायर गरेको थियो । हवाई फायरपछि स्थिति नियन्त्रणमा आएता पनि राजनितिक दलबीच सहमति नमिल्दा त्यस मतदान केन्द्रको मतदान प्रक्रिया नै रोकिएको जिल्ला निर्वाचन कार्यालय रामेछापका निर्वाचन अधिकृत मधुकार शाहले जानकारी दिनुभयो ।

‘मतदान अवरुद्ध पछि पुनः मतदान प्रक्रिया सञ्चालन गर्न राजनितिक दलसँग बसेर सहमतिको प्रयास गर्दा पनि विवाद नमिलेपछि उक्त केन्द्रको मतदान प्रक्रिया स्थगित गर्न निर्वाचन आयोगमा परिपत्र गरिसकेका छाैँ’, उहाँले भन्नुभयो, ‘आयोगले उक्त मतदान केन्द्रमा कहिले मतदान गर्ने भन्ने विषयमा परिपत्र गरेपछि पुनः मतदान गर्ने विषयमा मिति टुङ्गो लाग्नेछ ।’