सप्तरी – सप्तरीको महादेवा गाउँपालिकामा कर्मचारीकाे रेकर्ड लथालिङ्ग भएकाे पाइएकाे छ । लेखा शाखामा कार्यरत कर्मचारीका कारण आफूहरूकाे रेकर्ड लथालिङ्ग भएकाे गाउँपालिकाका कर्मचारीले गुनासाे गरेका छन् । 

लेखा शाखामा कार्यरत लेखापाल रमेशकुमार चौधरी र सह–लेखापाल हिरालाल यादवले कर्मचारीको तलबको सिटरोल, भरपाइ हेर्न नदिएको कर्मचारीले बताएका छन् । सही, छाप नभएकाे पाइएमा तलब, भत्ता घटबढ हुने गरेको उनीहरूकाे गुनासाे छ ।  

त्यस्तै कर्मचारी सञ्चय कोष, नागरिक लगानी कोष, बीमालगायतमा महिनैपिच्छे तलबबाट काटिने रकम समयमा दाखिला नगर्ने गरेकाे एक कर्मचारीले बताए । लेखापाल चौधरी र सह–लेखापाल यादवले कर्मचारीकाे हितमा काम नगरेका कारण अवकाशको समयमा पेन्सन पटा बनाउने समयमा पीडा भोग्नुपर्ने बाध्यता रहेकोले समयमै यसतर्फ सम्बन्धित पक्षको ध्यान पुग्नुपर्ने कर्मचारीको माग छ । 

लेखा शाखामा कार्यरत कर्मचारीले कमिसन उठाउने काममा बढी समय खर्चिने गरेका कारण आफूहरूकाे रेकर्ड समयमा अपडेट नभएकाे उनीहरूकाे आराेप छ ।