धनकुटा – १५ औँ संस्करणको शहीद भीमनारायण गोल्ड कप फुटबल प्रतियोगिताको उपाधि प्लानिङ ब्वाइज क्लब काठमाण्डाैले जितेको छ ।

धनकुटाको तल्लो टुँडिखेलमा आज बुधवार भएकाे फाइनलमा वीरगञ्ज युनाइटेड क्लबलाई ४–० को फराकिलो गोल अन्तरले हराउँदै प्लानिङ ब्वाइजले उपाधि जितेकाे हाे । प्लानिङ ब्वाइजका लागि विदेशी खेलाडी याे निपाेलियनले २ तथा समिर थापा र विशाल दर्जीले १/१ गाेल गरे ।

उपाधिसँगै प्लानिङ ब्वाइजले पाँच लाख रुपैयाँ पाएकाे छ । यस्तै उपविजेता बनेकाे वीरगञ्ज युनाइटेडले दुई लाख ५० हजार रुपैयाँ पायाे । फाइनल खेलको म्यान अफ द म्याच विजेता टिमका अभिनास थापा मगर घोषित भए । उनले चार हजार रुपैयाँ पाए ।

त्यस्तै विजेता टिमका विशाल दर्जी उत्कृष्ट रक्षक, उत्कृष्ट गोलकिपर लोकेश चौधरी, उत्कृष्ट स्ट्राइकर यो निपोलियन घोषित भए भने वीरगञ्जका उमेश कार्की उत्कृष्ट मिडफिल्डर घोषित भए । उनीहरूले सात/सात हजार रुपैयाँ पाए । प्रतियोगिताको सर्वोत्कृष्ट खेलाडी प्लानिङ ब्वाइजका डेडी वाम्वा घोषित भए । उनले १५ हजार रुपैयाँ पाए । खेलाडीहरूलाई एन्फाका उपाध्यक्ष दावा लामा, पाख्रीबास नगरपालिकाका मेयर ज्ञानबहादुर गुरुङलगायतले पुरस्कार वितरण गरेका थिए ।