सर्लाही – सर्लाहीमा बाग्मती नदीले बगाउँदा एक जनाको ज्यान गएको छ । रौतहटको गढीमाई नगरपालिका–२ घर भएका ६६ वर्षीय शहीद रायलाई नदीमा आएको बाढीले बगाउँदा ज्यान गएको प्रहरीले जनाएको छ ।

पुल तर्न लाग्दा रायलाई नदीले बगाएपछि स्थानीयले उद्धार गरी अस्पताल पुर्‍याएलगत्तै डाक्टरले मृत घोषणा गरेका थिए । सर्लाही हजरियामा रहेको खेतमा काम गर्न आउँदै रायलाई नदीले बगाएको स्थानीयले बताएका छन् ।

त्यसैगरी लखन्देही नदीमा आएको बाढीले सर्लाही कौडेना गाउँपालिकाको केही वडा डुबानमा परेको जिल्ला प्रहरी कार्यालय सर्लाहीका प्रहरी नायब उपरीक्षक (डीएसपी) दीपेन्द्र पंजियारले जानकारी दिनुभयो । हिजाे सोमवार रातिदेखि परेको पानीले कच्ची सडक बगाउँदा सिन्धुली र सर्लाहीको चुरे क्षेत्रमा यातायात ठप्प भएका छन् ।