काठमाण्डाै – सङ्घीय संसद् प्रतिनिधि सभा अन्तर्गतको कानुन, न्याय तथा मानव अधिकार समितिको बैठकमा सांसदहरूले सङ्क्रमणकालीन न्यायसम्बन्धी विधेयक जतिसक्दो चाँडो समितिबाट वा प्रतिनिधि सभा बैठकमा पेस गरेर टुङ्गो लगाउनुपर्नेमा जोड दिएका छन् ।

नेपाली कांग्रेसका प्रमुख सचेतक रमेश लेखकले सङ्क्रमणकालीन न्यायसम्बन्धी विधेयक एक हप्ताभित्र टुङ्गाेमा पुर्‍याउन कानुन, न्याय तथा मानव अधिकार समितिलाई आग्रह गर्नुभयो । उहाँले पीडित, नागरिक समाज र सञ्चारमाध्यमको दबाबलाई समेत ख्याल गर्दै विधेयक एक पटक छलफल गरेर फागुन १९ गतेभित्र टुङ्गाे लगाइसक्नुपर्ने प्रस्ताव गर्नुभयो ।

यस्तै प्रमुख प्रतिपक्ष दल नेकपा एमालेका सचेतक महेशकुमार बर्तौलाले पनि सङ्क्रमणकालीन न्यायसँग सम्बन्धित विधेयकलाई छिटो टुङ्ग्याउनुपर्ने बताउनुभयो । उहाँले समितिमा उठेका विषयहरूलाई छलफल गरी छिटोभन्दा छिटो पीडितमैत्री कानुन बनाई पारित गर्न आवश्यक रहेको बताउनुभयो । सङ्क्रमणकालीन न्याय राजनीतिक प्रकृतिको विषय भएकाले सबैको सहमतिमा टुङ्ग्याउन आवश्यक रहेको उहाँकाे भनाइ छ ।