काठमाण्डौ – काठमाण्डौ महानगरपालिकामा झण्डै दुई लाख जना करदाताले नियमित कर नतिर्ने गरेको पाइएको छ । महानगरमा दर्ता भएका करदाता तीन लाख १२ हजार भए पनि दुई लाखले नियमित कर नतिर्ने गरेको पाइएको हो।

लामो समयदेखि दर्ता प्रक्रियामा नै नआएकाहरु कर तिर्नका लागि आलटाल गरिरहेका करदातालाई नियमअनुसार समावेश गर्नका लागि महानगरले वडास्तरीय अनुगमन गरी नियमसङ्गतरुपमा ल्याउने तयारी गरेको राजस्व विभागले जनाएको छ । कर तिर्नका लागि आलटाल गर्नेमा सबैभन्दा धेरै घरबहाल करमा झण्डै एक लाख करदाता रहेका छन् ।

त्यस्तै व्यवसाय कर, मनोरञ्जन कर र विज्ञापन करमा एक लाखको हाराहारीमा रहेको विभागका प्रमुख ध्रुव काफ्लेले जानकारी दिनुभयो । उहाँका अनुसार दर्ता प्रक्रियामा नआएका सबै शीर्षकका करदातालाई नियमअनुसार बनाउनका लागि यसै महिनादेखि महानगरको ३२ वटै वडाबाट नियमित अनुगमन गरी प्रक्रियामा ल्याउने तयारी महानगरको रहेको छ ।

महानगरमा कर तिर्नका लागि दर्ता प्रक्रियामा आएका तर नियमित कर नबुझाउने करदाताबाट पनि दुई अर्ब रुपैयाँ बक्यौता असुल गर्न बाँकी रहेको प्रमुख काफ्लेले जानकारी दिनुभयो ।

चालु आर्थिक वर्षका लागि जम्मा १० अर्ब ८० करोड रुपैयाँ वार्षिक लक्ष्य लिएको महानगरले चालु आर्थिक वर्षमा ७ महिनाको अवधि पार गरिसक्दा पाँच अर्ब ८० करोड ५१ लाख ९०  हजार रुपैयाँ राजस्व उठाएको छ ।