काठमाण्डौ – काठमाण्डौको सुन्धारामा महानगर प्रहरी र फुटपाथ व्यवसायीबीच भएको झडपको विषयमा दुवै पक्षले एक अर्कालाई दोष दिएका छन् । महानगर प्रहरीले दमन गरेको व्यवसायीको आरोप छ भने महानगर प्रहरीले भने प्रतिरक्षा मात्रै गरेको दाबी गरेको छ ।

अस्ति बुधवार बेलुकी भएको झडपमा घाइते भएकाहरु राष्ट्रिय ट्रमा सेन्टरमा उपचारपछि घर फर्किएका छन् । अस्ति बेलुका भएको झडपमा १० जना नगर प्रहरी र ६ जना फुटपाथ व्यवसायी घाइते भएका थिए । घाइतेहरुको केहीको पाखुरा, ढाड र टाउकोमा चोट लागे पनि अवस्था सामान्य रहेकाले उपचारपछि सबैलाई घर पठाएको ट्रमा सेन्टरका प्रमुख डा बद्री रिजालले बताउनुभयो ।

काठमाण्डौ महानगरपालिकाले राति ९ बजेपछि फुटपाथ व्यवसाय राख्न दिने निर्णय गरेकोमा व्यवसायीले बेलुका ७ बजे नै फुटपाथमा पसल राख्न थालेको र नगर प्रहरीले रोक्न खोज्दा दुवै पक्षबीच झडप भएको महानगरले जनाएको छ । तर फुटपाथ व्यवसायीले नगर प्रहरीको टोलीले योजना नै बनाएर फुटपाथ व्यवसायीमाथि भौतिक आक्रमण गरेको आरोप लगाएका छन् ।

अरूबेला सामान जफत गर्न खोज्दा घम्साघम्सी हुने भए पनि अस्ति बेलुका नगर प्रहरी सामान खोस्न नभइ आक्रमण गर्ने उद्देश्यले नै आएको र लाठी र बुटले हानेको व्यवसायीको आरोप छ । तर नगर प्रहरी प्रमुख राजुनाथ पाण्डेले भने प्रतिरक्षाका लागि लाठी चार्ज गर्नुपरेको तर्क गर्नुभएको छ ।

सुन्धारा सडक किनारामा व्यापार गर्न आएका व्यापारीलाई पैदल मार्गमा व्यापारीक क्रियाकलाप नगर्न अनुरोध गर्दा नगर प्रहरीमाथि आक्रमण भएको र यसबाट बच्न नगर प्रहरीले प्रतिरक्षा गरेको उहाँले बताउनुभयो । तर नगर प्रहरीले फुटपाथ व्यवसायीलाई अमानवीय ढङ्ले कुटपिट गरेको भन्दै आलोचना भैरहेको छ ।