काठमाण्डौ – सत्ता गठबन्धन र मन्त्रीहरु परिवर्तन भए पनि लगानी सम्मेलनको तयारीमा कुनै असर नपरेको लगानी बोर्डले जनाएको छ । आउँदो वैशाखको १६ र १७ गते नेपालमा तेस्रो लगानी सम्मेलन हुँदैछ ।वैदेशिक लगानी भित्र्याउन यो सम्मेलनलाई निकै महत्वका साथ हेरिएको छ । सत्ता गठबन्धन परिवर्तन भएकै कारण लुम्बिनीमा हुन ठिक्क परेको ‘बालबालिका, विकास र शान्तिका लागि लरियट्स एन्ड लिडर्स अन्तर्राष्ट्रिय चौथो शिखर सम्मेलन’ स्थगित भएको थियो ।

९ जना नोबेल पुरस्कार विजेतासहित विभिन्न देशका राष्ट्रप्रमुख, पूर्वप्रधानमन्त्रीसहित १८ जना विशिष्ट अतिथि आउने निश्चित भए पनि अन्तिम समयमा सम्मेलन स्थगित हुँदा अन्तर्राष्ट्रिय जगतमा नेपालको छवि धुमिल भएको छ । तर लगानी सम्मेलनको तयारीमा भने कुनै समस्या नरहेको लगानी बोर्डका सहसचिव तथा प्रवक्ता प्रद्युम्न प्रसाद उपाध्यायले जानकारी दिनुभयो ।

सरकारको प्राथमिकतामा परेको र नियमित कार्यक्रम भएकाले सत्ता गठबन्धन र मन्त्रीहरु फेरिँदैमा सम्मेलनको तयारीमा कुनै असर नपरेको उहाँको भनाइ छ । लगानी सम्मेलन प्रधानमन्त्री प्रचण्डको उच्च प्राथमिकतामा रहेको र मन्त्रीहरु फेरिए पनि प्रधानमन्त्री उहाँ नै रहेकाले तोकिएको समयमै सम्मेलन हुनेमा कुनै समस्या र द्विविधा नरहेको उपाध्यायले जानकारी दिनुभयो ।

सम्मेलनमा १ सय २८ वटा परियोजना सोकेसमा राख्ने तयारी छ । बोर्डले गौतम अडानी, एलन मस्क, मार्क जुकरवर्ग, मुकेश अम्बानी, ज्याकमासहित विश्वका १७ जना ठूला धनाढ्यलाई निम्ता पठाइसकेको छ । विभिन्न देशका दूतावासमार्फत बोर्डले झन्डै २ हजार जना लगानीकर्तालाई बोलाउने तयारी गरेको छ ।  सम्मेलनका लागि विभिन्न समिति बनेर काम भइरहेको छ ।